OS 100 DO BARBANZA 2024

Os 100 dos International Trekkers é unha proba non competitiva de sendeirismo/ultratrail de 100 Km a realizar nun máximo de 24 horas, organizada polo Club Deportivo International Trekkers Barbanza Sar.

A proba ten como saída o concello de Rianxo ás 16h do 22 de xuño de 2024. Haberá un traslado en transporte público dende o punto de encontro (Pavillón Deportes Rianxo "José Manuel Abuín") ata o lugar de saída. O percorrido, balizado é de 100km polos concellos de Rianxo, Lousame, Noia, Porto do Son, Ribeira, Pobra, Boiro con chegada de novo a Rianxo, a completar nun tempo máximo de 24 horas. A proba rematará, polo tanto, ás 16h do 23 de xuño de 2024 no lugar de encontro anteriormente indicado. Débese realizar o percorrido completo polo itinerario que está indicado no track facilitado a todos os inscritos con anterioridade suficiente ao inicio desta.

A proba é de resistencia, e unicamente se poderá facer correndo ou andando como medio de progresión, estando prohibido calquera tipo de axuda externa ou implemento que non sexan os propios físicos e os bastóns de sendeirismo.

Finalizará a proba todo aquel participante que chegue á meta en menos de 24 horas desde o inicio da mesma e que pasara por todos os puntos de control.